Gaur hasiko dira San Joan festak Hernanin (Gipuzkoa), eta Mugimendu Sozialistak prest dauka txosna Tilos pasealekuan, Hernaniko Txosna Batzordearen kontrolpeko eremutik kanpo. Ezker Abertzaleak eta Mugimendu Feministak bultzatuta, eta Hernaniko Udalaren babesarekin, beto politikoa ezarri diote Mugimendu Sozialistari Txosna Batzordean; hala, debekatu egin diote ohiko txosnagunean txosna bat jartzea. Egoerari inolako aterabiderik eman ez zaionez, esku hartu eta, debekuak debeku, txosna bat muntatzea erabaki du Mugimendu Sozialistak. Herenegun izan ziren muntaketa-lanak, eta irekitzeko prest dago.
20:00etan jarriko dute martxan Mugimendu Sozialistaren txosna, eta Izar Haitz garagardoaren dastaketa antolatu dute ordurako. Biharko pintxo-poteoa izango da 19:00etan, eta etzi, mojitoak prestatuko dituzte Hernaniko Gazte Asanbladak antolatutako herri bazkariaren osterako.