Arcelor Mittal enpresak Kazakhstango Karaganda eskualdean daukan ikatz hobi batean, lan-istripu izugarri bat izan da joan den asteburuan: ostiraletik larunbaterako gauean, metano leherketa bat izan zen Kostenko meatzean, eta sute handi bat piztu zen ondorioz. Une horretan, 252 langile ari ziren bertan lanean.
Gutxienez 45 beharginek galdu zuten bizia, eta haien gorpuak aurkitu zituzten larrialdi-zerbitzuetako langileek. 208 meatzari erreskatatu zituzten (hamazazpi ospitaleratu behar izan zituzten).
Arcelor Mittallek bederatzi lantegi ditu Hego Euskal Herrian: Bergaran (Gipuzkoa), Berriobeitin (Nafarroa), Etxebarrin (Bizkaia), Legasan (Nafarroa), Legution (Araba), Lesakan (Nafarroa), Olaberrian (Gipuzkoa), Sestaon (Bizkaia) eta Zumarragan (Gipuzkoa). 2006an sortu zen enpresa, Arcelor eta Mittal Steel batu zirenean; Lakshmi N. Mittal enpresaburu indiarra da zuzendari nagusia.