Irabaziak metatzen eta areagotzen jarraitzen du Iberdrolak. 2024ko lehen hiruhilekoko emaitzen berri eman du jada, eta goranzko joerari eusten dio: 2.760 milioi euro irabazi ditu urteko lehen hiru hilabeteetan. 2023ko azken datuekin alderatuz gero, %86ko igoera bat izan du, beraz, hiruhileko honetan.
Zehaztu dutenez, Mexikon saldutako aktiboen gainbalioari (1.165 milioi euro) eta Erresuma Batuko tarifa-defizitaren berreskuratzeari (238 milioi euro) esker lortu du etekina areagotzea energia-enpresak. Dena den, bi aldagai horiek baztertuz gero ere goranzkoa izango litzateke emaitzen bilakaera: %28ko gorakada bat edukiko luke.
2023an, inoizko emaitzarik onenak lortu zituen Iberdrolak. Guztira, 4.803 milioi euroko irabaziak lortu zituen, 2022an baino %10,7 gehiago.