Bizkaiko Novaltia enpresako langileek bi urte eta erdi daramatzate greban, 2019ko uztailaren 22an ekin baitzioten greba mugagabeari. Hain zuzen, gaur, urtarrilaren 12an, 905. greba eguna beteko dute farmazia-enpresako beharginek itun berri baten aldeko borrokan.
Duela hiru urte lan-hitzarmen propioa ezeztu zuen enpresak eta, modu horretan, Espainiako Estatuaren hitzarmena aplikatu zaie langileei, soldata 950 euro ingurura jaitsiz eta orokorrean lan-baldintzak okerragotuz. Hori ez ezik, soldata-arrakala ere seinalatu dute langileek; antza, kontratazio berrien ordainsaria %35 txikiagoa da, eta langileak jaiegunetan ere lan egitera behartzen dituzte.
Greba eskubidearen urraketa eta erasoak
Aurreko urtean bezala, langileek haien greba eskubidearen urraketa salatu dute, Novaltia vulnera, Inspección tolera lelopean. Izan ere, enpresak aldi baterako langileak kontratatzen ditu, grebalariak ordezkatzeko. Gainera, ordezkapenak Lan Ikuskaritzaren "baimenarekin" egiten direla salatzen dute beharginek, bai eta zuzendaritzak negoziazioari uko egiten diola ere.
Bestalde, jazarpena eta erasoak jasan dituztela ere salatu dute; besteak beste, epaiketa baten ostean, "espediente bidez errepresaliak" hartu omen zituen zuzendaritzak, eta haien aurkako salaketa penalekin ere mehatxatu zituen.