Gazte Koordinadora Sozialistak (GKS) eta Ikasle Abertzaleakek (IA) asteburu honetan egingo dute Gazte Topagune Sozialista, Atarrabian (Nafarroa) eta Burlatan (Nafarroa). EH Bildu-Sortuk ekimenari arrazoi politikoengatik jarritako debekuen gainetik, Topagunearekin aurrera jarraitzen dute gazteek, eta egitaraua moldatu dute: urriaren 13an eta 14an izango da; bi egunez, beraz.
Antolatzaileek jakinarazi dutenez, agortu dira jada Topagunerako sarrera guztiak; bono orokorrak, nahiz larunbateko kontzertuetarako tiketak. Larunbatean, beraz, ezingo dira kontzertuetarako sarrerak Totem aretoko leihatilan eskuratu, amaitu baitira jada.