Agurainen (Araba), 19 urteko gizonezko bat atxilotu zuten asteartean, bere bikotekideari sexu-erasoa egitea eta lesioak eragitea leporatuta. Astearte goizaldean izan zen erasoa, eta gertatutakoa salatu zuen neskak. Atxilotua epailearen aurrera eramatean, hura behin-behinean kartzelaratzeko agindua eman zuten.
Aurrez ere ikertu zuten mutila, bikotekideari tratu txarrak emateagatik. Izan ere, emakumearekiko urruntze-agindu bat zuen, aste honetan eraso dionean.
Donostian, sexu-jazarle baten kontrako salaketa
Bestalde, Donostian (Gipuzkoa), gizon batek egindako sexu-jazarpena salatu dute gutxienez hamazazpi emakumek. Orain dela astebete jarri zuten martxan @denuncias_euskalherria kontua Instagramen, eta emakume ugari ari dira horretara jotzen sexu-erasoen berri emateko. Bada, Iñaki Castro izeneko musika-teknikari ezagun bat seinalatu dute gutxienez hamazazpi neskak, sexu-jazarpenagatik.
2020tik hona, emakume ugarik jakinarazi dute Castrok jazarri dituela, "modus operandi" antzekoarekin beti. Hori jakina izan arren, musika-jaialdi ugaritan parte hartzen jarraitzen du, hala nola Kutxa Kultur, Glad is the Day, Dantz, Boga Boga eta BIME ekimenetan.