Aldi baterako enplegu-erregulazioko espediente bat ezarri nahi du Amurrion (Araba) Tubos Reunidoseko enpresa-zuzendaritzak, 850 langilerengan izango lukeena eragina. Espedienteari buruzko kontsulta-aldia uztailaren 8an hasiko da ofizialki, eta zuzendaritzak orduan jakinaraziko ditu neurriaren xehetasunak eta horretarako erabiliko dituen argudio zehatzak.
Dena den, hainbat hedabidek aurreratu dutenez, eskaeretan izandako jaitsiera argudiatuko du enpresak espedientea aplikatzeko. El Correo-ren esanetan, "egoera geopolitikoak" eta gaur egungo muga-zergek eragin dute jaitsiera hori, eta aurreikuspenek diote, ustez, okerrera egingo duela merkatuak. Enpresak, oraingoz, esan du "behin-behinekoa" izango litzatekeela Amurriora begira hartu nahi duen erregulazio-neurria, eta "malgutasuna" emango liokeela horrek.
1892tik dago martxan Tubos Reunidos enpresa, eta Amurriokoa da bere egoitza nagusia. Aipatutako egunkariak emandako datuen arabera, 2024. urtearen amaieran, enpresak 1.400 bat langile zituen Amurrioko, Trapagarango (Bizkaia) eta Houstongo (Amerikako Estatu Batuak) lantegietan. Azken hiru urteetan, irabaziei dagokienez, emaitza positiboekin bukatu du urtea.