Aste honetan greba egingo dute berriz Bizkaiko metalgintzako langileek

Atzo bildu ziren berriz sindikatuak eta Bizkaiko patronala. Hogeita batgarren batzarra izan zen atzokoa, baina ez zen adostasunik izan. "FVEMek berriz erakutsi du ez duela asmorik langileen baldintzak duinduko dituen hitzarmen bat adosteko", salatu du ELAk. Hala, beharginek berriz hartuko dituzte kaleak aste honetan; hilaren 20an eta 21ean, hain zuzen. Gero eta handiagoa da greba deialdiek duten erantzuna; azkenengoan, %85 ingurukoa izan zen.

Metalgintza sektoreko hitzarmena 2011. urtetik dago berritu gabe. Hitzarmena berritzeko negoziazioetan jarraitzen dute sindikatuek eta Bizkaiko patronalak, eta momentuz, ez dute akordiorik lortu. Beraz, aste honetan ere greba egingo dute metalgintzako langileek; ekainaren 20an eta 21ean, hain zuzen.

Talkak gora

Atzo, astelehena, batzarra izan zuen negoziatzeko osatutako batzordeak. Elkarrizketak hasi zirenetik, 21 bilera egin dituzte dagoeneko. ELA sindikatuaren arabera, Bizkaiko Metalgintzako Enpresen Federazioak (FVEM) “berriz erakutsi du ez duela asmorik langileen baldintzak duinduko dituen hitzarmen bat adosteko”. “Mugimendu txiki bat baino ez du egin, tauletako soldaten proposamenean, baina oraindik, eskaera sindikaletatik oso urrun”, azaldu du ELAk.

Hala, FVEMek oraindik ez die erantzun sindikatuek maiatzaren 10ean egindako eskaerei. Are gehiago, oraindik ez ditu mahaira ateratako hainbat puntu aipatu ere egin; esaterako, soldata errealetarako igoerak, subrogazio eskubidea, aldi baterako enpleguak, lanaldi murrizketa, edota berdintasunaren eta lan osasunaren arloak. Malgutasunari eta ezgai agiriei dagokienez, “atzerapausoak liratekeen puntuak mantendu” ditu FVEMek.

Haserrea gora

Maiatzaren 23an, langile gehienek bat egin zuten sindikatuen lehen greba deialdiarekin. Lanuztera deituta zeuden 250 enpresetako 50.000 langileetatik, %70-%80 artean atera ziren kalera. Ekainaren 6an ere kaleak hartu zituzten sektoreko beharginek; %85 ingurukoa izan zen grebaren erantzuna, eta herrialdean erreferente diren enpresa handien ekoizpena etetea lortu zuten, baita enpresa txikiena ere.

Ekainaren 6an lantegietara zihoazen pikete informatiboak identifikatu egin zituzten ertzainek, eta LAB sindikatuak salatu zuen "patronalaren piketeek oldarkor" jokatu zutela. Patronalak deitu zituen ertzainak.

Egun horretan, beharginek mobilizazio jendetsua egin zuten Bilbon (Bizkaia), eta kaleak hartu zituzten. Tentsioa izan zen bertan ere. FVEMen egoitzaren atarian amaitu zuten manifestazioa, eta langileak iritsi zirenerako, bertan zeuden ertzainen patruilak.

in AKTUALITATEA

Desalojoak, poliziaren bortizkeria, jazarpena eta hedabideen manipulazioa salatu ditu Iruñeko Alde Zaharreko okupazio mugimenduak

'Atera zuen esku zikinak gune okupatuetatik' izenpean, Iruñeko Alde Zaharrean azkenaldian bizitzen ari direna salatu dute okupazio mugimenduko kideek. Zapateria kalean desalojatu berri duten etxebizitza birjabetuaren inguruko gertakariak azaltzeaz gain, horren eta "narko etxebizitzen" artean hedabide batzuk sortzen ari diren nahasmena gaitzetsi dute. Iruñeko Udaltzaingoaren jarrera "bortitza" eta birjabetutako etxebizitzen aurkako jazarpena ere salatu dituzte. Ostegunean elkarretaratzea egingo dute Nabarrerian, eraso horiek guztiak salatzeko.