Gutxienez bi emakume bortxatu dituzte asteburuan Bizkaian. Ostiraletik larunbaterako gauean, Bilboko (Bizkaia) Arangoiti auzoko etxebizitza batean eraso zuen emakume bat 20 urteko gizon batek. Neskak larunbat goizean salatu zuen gertatutakoa, eta eguerdian atxilotu zuten erasotzailea.
Larunbat goizaldean, gainera, beste emakume bati eraso zioten Lemoan (Bizkaia), gaueko aisialdirako lokal baten inguruan. Neskarengana hurbildu zen 25 urteko gizon bat, eta bortxatu egin zuen. Hainbat lekukok hots egin zioten poliziari, eta erasotzaileak inguruan jarraitzen zuenez, han atxilotu zuten.
Bestalde, Deustuko (Bilbo, Bizkaia) festetan ere salatu dute eraso bat: larunbat goizaldean, ukituak egin zizkioten emakume bati txosna gunean.
Gasteizen (Araba) berdina jasan behar izan zuen beste emakume batek larunbat gauean. Aisialdirako lokal batean, emakume bati ukituak egin zizkion gizon batek. 03:00ak aldera atxilotu zuten erasotzailea; 42 urte ditu.