Ostiralean izan zen berri pozgarria Durangon (Bizkaia): Gaztetxe berri bat ireki dute bertan. Lehen Correosena zen eraikina birjabetu du Kaletik Gaztetxera asanbladak, udaletxe aurrean, eta Gaztetxe bihurtu du. Asanbladak urtebete inguru darama espazio baten aldeko borrokan, baina ikusita udalak ez diola "gazteon beharrak asetuko dituen espazio bat lortzeko bermerik eman", urrats bat egitea erabaki du. "Aurreko esperientzietatik ikasi dugu ezin garela udalen promesen zain geratu", azaldu zuen ostiralean bertan.
Durangoko Gaztetxearen berri eman zutenetik, jende ugari hurbildu da bertara. Larunbat goizean, Gaztetxearen nondik norakoez hitz egiteko batzar informatibo bat egin zuten asanbladako kideek, eta beste hainbat kultur-ekimen ere antolatu zituzten egun horretarako. Oihana Bartra eta Gorka Pagonabarraga bertsolariak kantuan aritu ziren eguerdian, Gaztetxe aurretik hasi zen bertso-poteo batean, eta Idoia Asurmendi, Chill Mafia eta Malakias MX3 proiektuko kideek musika-emanaldiak eskaini zituzten iluntzean.