Gazte Koordinadora Sozialistak urtarrila amaieran aurkeztu zuen mobilizazio ziklo berria, Burgesiaren ofentsiba gelditu! aldarrikapenari beste behin helduta. Hala, aurreko asteburuan ekin zieten protestei lekuan leku, eta egun bizi ditugun "osasun-hondamendia eta askatasunen ezabapenak" salatu zituzten ehunka pertsonak. Burgesiak pandemiari "kriminalizazioaren, errepresioaren eta askatasunen ezabapenen bitartez egin nahi diola aurre" seinalatu zuten, besteak beste.
Atzo eman zieten jarraipena mobilizazioei; hain zuzen, Iruñean (Nafarroa), Zarautzen (Gipuzkoa), Gasteizen (Araba), Durangon (Bizkaia) eta Hernanin (Gipuzkoa) egin zituzten elkarretaratzeak, eta ehunka lagunek aldarrikatu zuten berriz "burgesiaren ofentsiba gelditzeko".
Hurrengo asteburuan Azpeitian (Gipuzkoa), Bilbon (Bizkaia), Donostian (Gipuzkoa), Irunen (Gipuzkoa), Baionan (Lapurdi) eta Gernikan (Bizkaia) izango dira mobilizazioak.