Marco Rubio AEBetako estatu-idazkariak otsailaren 3an berretsi zuen migrazio-akordio bat Nayib Bukele El Salvadorreko presidentearekin. Itunaren arabera, El Salvadorrek AEBetatik deportatutako pertsona migratzaileak onartuko ditu eta bertako kartzeletan mantenduko ditu, edozein dela ere haien nazionalitatea. Gainera, gaur egun AEBen zaintzapean dauden "kriminal arriskutsuak" El Salvadorren hartzeko eskaintza egin du Bukelek.
Azkeneko prentsaurrekoan, Bukeleren proposamena "aurrekaririk gabeko adiskidetasun-eskaintzatzat" jo zuen Rubiok. El Salvadorreko agintariak, bestalde, akordioak alde biko harremanetan eta Latinoamerika osoan mugarri bat ezartzen duela ziurtatu zuen. "Akordio askoz ere handiagoa da, eta aurrekaririk ez duena", adierazi zuen. Hala ere, ez dute zehaztu nola finantzatuko duten ituna, ez eta El Salvadorreko espetxe-sisteman zein eragin izango duen ere.
Iragarpenak hainbat erreakzio ekarri ditu. Washingtongo sektore batzuek "migrazio-krisia arintzeko estrategia" gisa ikusten duten bitartean, kritikoek ohartarazi dute El Salvadorreko kartzelak gainkargatu ditzakeela eta deportatutako migratzaileen giza-eskubideak arriskuan jar ditzakeela. Datozen egunetan akordioaren ezarpenari buruzko xehetasun gehiago ematea espero da.