Palestinarekin Elkartasuna plataformaren ekimenez, 24 orduko baraualdiak izaten ari dira une honetan, palestinar herriari elkartasuna adierazteko. Hego Euskal Herriko lau hiriburuetan atzo arratsaldean ekin zieten barauei, arratsaldeko 19:00etan, eta horretarako gune bana prestatu dute hiri bakoitzean, egitarau zabalekin. Altsasun, berriz, egun bat lehenago ekin zieten barau-egunei, eta txandaka ari dira hainbat lagun.
Palestinar erresistentzia babestu. Israel eta bere konplizeei aurre egin lelopean, aipatutako plataformak mobilizazio-deialdi nazional bat egin du biharko. Oraingoan ere Bilbon (Bizkaia) joko dute protestara: Jesusen Bihotzetik hasiko da manifestazioa, eguerdiko 12:00etan.