Azken urteetan egin bezala, Durangoko (Bizkaia) Azokaren bueltan, hainbat ekimen prestatu ditu Durangaldeko Kontseilu Sozialistak. Badarama denbora Guda Goiena izeneko jardunaldi bat antolatzen, eta aurten ere heldu dio horri. Ostiral honetarako jarri du hitzordua, abenduaren 6rako, eta oraingoan hitzaldi indartsu bat jarri du egitarauaren erdigunean: Kultur borroka, zergatik eta zertarako. 11:00etan izango da, Durangoko San Antonio Santa Rita ikastetxean.
Ostalaritzako gehiegikerien kontra
Eguerdian mobilizazio bat egingo dute, Durangaldeko Laneko Autodefentsa Sarearen (LAS) eskutik. Ostalaritzako abusuen aurrean antolatzera deitzeko manifestazio bat izango da, Durangoko erdiguneko kaleetan barrena. 13:30ean hasiko da Andra Maritik. Horren ostean, San Antonio Santa Rita ikastetxean bertan bazkaltzeko aukera egongo da.
Durangaldeko LASek duela gutxi eman du ostalaritzako lan-gatazka baten berri. Abadiñoko (Bizkaia) Xirimiriko beharginak ari dira borrokan, nagusiek taberna bat-batean zarratu eta gero. Guztira, 20.000 euro inguru zor dizkiete oraindik langileei.