Atzo, apirilak 6, baldintzapean aske utzi zuten Gorka Fraile preso politikoa, Espainiako Auzitegi Nazionaleko Espetxe Zaintzaren aginduz. Larriki gaixo dago durangarra duela bost urtetik, eta pasa den urtarrilean ezarri zioten hirugarren gradua, Iruñeko (Nafarroa) espetxean. 1998. urtean giltzaperatu zuten ETA erakundearekin lotuta, hortaz, 22 urte egin ditu preso.
Espetxe Zaintzako epaile Jose Luis Castrok martxoaren 27an atera zuen argitara autoa, Fraile baldintzapean aske uztea eskatzen zuena. Horretarako, Frailek zigorraren hiru laurdenak bete dituela adierazi zuen epaileak, baita preso politikoa "gizarteratu dadin pronostiko indibidualizatu eta aldeko bat" egon badagoela ere. Autoa irmoa da dagoeneko, eta atzo sartu zen indarrean.
"Tratu iraingarria" ebakuntzan
Izatez, 2023 hasierara arte ezarri zioten kartzela zigorra Fraileri. Minbizia atzeman zioten mingainean 2015. urtean, eta Badajozko Ospitalean hasi zuen tratamendu kirurjikoa. Ospitaleratu zutenean "tratu iraingarria" jaso zuela salatu zuten presoaren senideek; izan ere, besteak beste, ebakuntzaren unera arte eskuburdinekin lotuta izan zuten, eta gauean loa ukatu zioten poliziek, "soinuen, ahotsen, mehatxuen eta horman emandako kolpeen bidez". "Azkenean, kirofanoan sartu eta bertan egon zen Polizia ebakuntza amaitu bitartean", azaldu zuten orduko hartan.
Durangarraz gain, beste 73 euskal preso politikok bete dituzte jada espetxe zigorren hiru laurdenak (edo aurten beteko dituzte). Dena den, 28 baino ez dira bigarren graduan daudenak, eta zortzik baino ez dituzte irteera baimenak izan.