Barakaldoko (Bizkaia) eta Sestaoko (Bizkaia) PCB Precision Castings Bilbao filialetan lan-erregulazio espedientea aurkeztuko duela jakinarazi du ITP Aero taldeak. Zehaztasun gehiago eman ez badute ere, 510 langile dira guztira planta horietan -400n Barakaldon eta 110 Sestaon-, eta %10ei eragingo lieke espediente berriak. Aurrez, otsailetik, finkoak ez ziren langileak bota zituzten, beste 160 bat behargin.
Irailean, Zamudion (Bizkaia) ere kaleratzeak iragarri zituen ITPk: 121 langile kaleratu zituzten, tartean 58 urtetik gorako 42 pertsona, aurretiazko erretiroa hartzera behartuz, baita behin-behineko langile ugari ere. CCOO eta UGT sindikatuekin adostuta egin zuten. Lanean jarraitu duten beharginak, gainera, hamalau hilabeteko lan-erregulazio txosten baten eraginpean ari dira. Urrian, hiru eguneko greba egin zuten langileek.
Kasu hartan, antolaketa eta ekoizpen arloko arazoak argudiatu zituen ITPk; aldiz, langileek salatu zuten enpresak ez dituela "behar bezala egiaztatzen arrazoiak, ez baitu hori justifikatzen duen frogarik aurkeztu".