Bergaran (Gipuzkoa) gizonezko batek egindako sexu-erasoak jasan ditu emakume batek otsailean zehar. Gutxienez hiru aldiz egin dio eraso neskari, Bergarako etxebizitza batean. Atzo atxilotu zuten 18 urteko erasotzailea, eta kartzelaratzeko agindua eman du epaileak.
Eraso horiek direla-eta, protestara deitu du Deba Bailarako Itaia Emakumeon Antolakunde Sozialistak. Bihar, ostegunean, elkarretaratze bat egingo dute Bergarako San Martin plazan, 19:00etan hasita. Indarkeria matxista orori aurre egin lelopean egin dute deialdia Itaiako kideek.
Euskal Herrian, gutxienez bost salaketa azken egunetan
Azken egunetan, gutxienez bost sexu-eraso atera dira argitara Euskal Herrian. Bi bortxaketaren berri eman dute Iruñean (Nafarroa), eta beste bi erasoren berri Bizkaian; Bilboko (Bizkaia) etxebizitza batean emakume bat bortxatu dute bi gizonek, eta Getxon (Bizkaia), emakume bati eraso dio gizon batek, kalean.