Bermeoko (Bizkaia) eraikinetako eta lokaletako garbiketa-zerbitzuko langileek atzo bete zituzten 140 egun greban, eta kalera atera ziren, beste behin, jasaten duten soldata-arrakala salatzera. Udalak azpikontratatuta dauka zerbitzua, baina langileek azaldu dute ez duela bere gain hartu nahi dagokion ardura: udaleko ordezkariak ez dira haiekin bildu uda aurretik.
Kaleko garbiketan jarduten duten beharginek, gehienak gizonezkoak, eraikinak eta lokalak garbitzen aritzen direnek baino 9.246,60 euro gehiago irabazten dituzte urtean. Bigarren zerbitzu horretan, hain justu, emakumezkoak dira gehienak. Soldata-arrakala hori gaindituko duen hitzarmen baten alde jo zuten grebara beharginek, baina momentuz airean daude haien aldarrikapenak, eta blokeatuta dago balizko elkarrizketa. Langileek argi zioten atzo Bermeoko kaleetan zehar eraman zuten pankartan: "140 egun, 0 bilera".