Urte amaieran, biolentzia kapitalistaren aurkako mobilizazio nahiz ekitaldiak antolatu zituzten hainbat Kontseilu Sozialistak. Osasun-egoera dela-eta zenbait deialdi bertan behera geratu ziren arren, zazpi herritan atera dira kalera azken egunetan.
Atzo Bilbon (Bizkaia), Lekeition (Bizkaia), Donostian (Gipuzkoa), Gernikan (Bizkaia) eta Tolosan (Gipuzkoa) izan ziren tokian tokiko Kontseilu Sozialistek deitutako manifestazioak; herenegun, ordea, Basaurin (Bizkaia) egin zuten elkarretaratze bat, Hego Uribeko Kontseilu Sozialistak eta Gazte Koordinadora Sozialistak deituta. Aurreko igandean, aldiz, Altsasun (Nafarroa) izan zen Sakanako Kontseilu Sozialistak eta GKSk elkarlanean antolatutako manifestazioa.
Mobilizazio guztietan izan zituzten gogoan, besteak beste, aurten soldatapean lanean ari zirela Euskal Herrian bizia galdu duten 61 langileak,
indarkeria matxistaren ondorioz erailak izan diren bost emakumeak, muga-bidean hil diren zazpi pertsona migratzaileak, beren buruaz beste egin duten 200 gazteak, nahiz kale gorrian bizi diren 3.000 pertsonak. Zenbaki horiek guztiak sistema kapitalistari berezkoa zaion
bortizkeriaren zenbait aurpegi direla nabarmenduta, biolentzia
kapitalistari aurre egiteko deia egin zuten mobilizazioetan.