Apirileko lau eguneko lanuztearen ostean, greba egingo dute berriz Uharteko (Nafarroa) Itaroa saltoki guneko Yelmo zinema aretoetako langileek. 35 beharginek "lan baldintza duinak" exijituko dizkiote, beste behin, Yelmo Films enpresari.
"Oinarriko langileen" artean, guztiek egin zuten bat apirileko grebarekin. Hainbat aldarrikapen mahaigaineratu zituzten, gutxieneko soldata batik bat. Enpresako zuzendaritzak, baina, behin eta berriro "bizkarra eman" diela azaldu dute langileek. Hainbat batzar egin dituzte borrokaldia hasi zenetik, baina ez dute akordiorik erdietsi. Besteak beste, soldatak, oporraldiak edota baimenak izan dituzte hizpide. Hortaz, berriro lanuztera deitzea erabaki dute langileek. Gaur, abenduak 19, hasi eta abenduaren 23ra arte izango da grebaldi berria. Guztira, 35 langile daude grebara deituta, eta aurreko deialdiaren jarraipena kontuan harturik, parte hartze handia aurreikusi dute.
Hainbat elkartasun keinu jaso dituzte Itaroako beharginek; esaterako, Madrilgo Yelmo Cines Idealeko langileen partetik, edota Berriozarko Talde Antikapitalistaren partetik.
Jazarpena
Iragan udaberriko greba deialdian, Guardia Zibilak hainbat langile kanporatu zituen saltoki gunetik, bezeroei gatazkaren nondik norakoak azaltzen ari zirela. Greba batzordeko kideei lantokira bertaratzen ez uzteagatik, zein greba eskubidea urratzeagatik, enpresa salatu eta auzitegietara jo zuten langileek. Izan ere, greban zeuden langileak ordezkatzen ere saiatu zen zuzendaritza, arduradun postuetako beharginen bidez.