Arriskuan dago Donostiako (Gipuzkoa) Zentro Sozialista, hura husteko prozedura jarri baitzuen martxan Sukia enpresak. Langile Kontrolpeko Espazioen Defentsa Komunitateak eta Donostiako Kontseilu Sozialistak azaroaren amaieran azaldu zuten egoera, eta desalojoaren kontrako hainbat protesta-ekintza izan dira ordutik: Sukiaren zenbait egoitza eta propaganda-taula markatu dituzte Euskal Herrian barrena, eta joan den asteartean elkarretaratze bat izan zen enpresaren egoitza nagusian.
Donostiako epaitegian gaurko zegoen ezarrita Zentro Sozialistaren kontrako bista, espazioa husteko prozedura judizialari lotuta. Defentsa Komunitateak jakinarazi du, baina, bista hori bertan behera uztea lortu dutela. Laster izango dira horri buruzko berri gehiago.
Dena den, epaitegi aurrean protesta bat izan da gaur goizean. 100 lagun inguru bildu dira, Donostiako Zentro Sozialistaren kontrako huste prozeduraren kontra, eta Zentro Sozialisten defentsan.
𝗕𝗜𝗦𝗧𝗔 𝗕𝗘𝗥𝗧𝗔𝗡 𝗕𝗘𝗛𝗘𝗥𝗔 𝗨𝗭𝗧𝗘𝗔 𝗟𝗢𝗥𝗧𝗨 𝗗𝗨𝗚𝗨 pic.twitter.com/aJ2xXK1f2A
— Defentsa Komunitatea (@defentsakom) December 1, 2023