Aurreko igandean, maiatzaren 29an, 31 urteko gizon bat atxilotu zuten Tuteran (Nafarroa), sexu-askatasunaren aurkako delitu bat, lesioak eragitea eta indarkeria erabilita lapurreta egitea leporatuta.
Izan ere, iluntzean, 20:00ak aldera, laguntza eskatu zuen emakume batek, gizon bat bera bortxatzen saiatu zela esanez. Hautsita zituen arropak, eta zaurituta zegoen.
Azaldu zuenez, bakarrik zegoenean hurbildu zen beregana gizona, eta birritan saiatu zen bera bortxatzen. Emakumearen lagun bat tokira joan zenean, ordea, ihes egin zuen erasotzaileak. Gainera, sakelako telefonoa lapurtu zion emakumeari, indarrez.
Erasoa gertatu eta lau ordura atxilotu zuten gizona, eta kartzelaratzea erabaki zuen epaile batek.