Urola Kostako Kontseilu Sozialistak aurreko ikasturtean antolatu zituen errefortzu-eskolak Zumaiako (Gipuzkoa) Etxape Zentro Sozialistan, "langile-klasearen elkarlaguntza eta defentsa" oinarritzat hartuta. Orduan azaldu zuten bi helburu nagusi dituela proiektuak: "bizi-baldintzen pobretze orokorrari aurre egitea", eta "euskara langileriaren proiektu kulturalean txertatzeko bidean ekarpena egitea".
Hainbat kideren lan boluntarioari esker, ikasturte honetan ere izango dira martxan errefortzu-eskolak. Doakoak eta irekiak dira, eta ikasketetako askotariko edukiekin laguntza eskaintzen dute klaseetan. Interesa dutenek, harremanetan jartzeko aukera dute 622 218 525 telefono zenbakiaren bidez, edo urolakosta@kontseilusozialista.eus e-mail helbidearen bidez.
Klase partikularrak Azpeitian ere
Azpeitiko (Gipuzkoa) Esklabak Zentro Sozialistan ere badute martxan halako proiektu bat, aurreko ikasturtetik. Urola Erdiko Kontseilu Sozialistaren esanetan, boluntario-talde batek ematen ditu klase partikularrak, eta ekin diote jadanik ikasturte berriari.