Atzo familia bat bota zuten etxetik Galdakaoko (Bizkaia) Zabalea auzoan. Hego Uribeko Kontseilu Sozialistak jakinarazi duenez, gainera, hutsik geratuko da etxea orain, salmenta izan arte. Atzorako zegoen finkatuta etxebizitzaren hustea, eta auzoko bizilagunek deituta, protesta bat izan zen goizean; etxe aurrean bildu ziren hainbat eta hainbat pertsona. Dena den, batzorde judiziala bertaratu zen Ertzaintzak lagunduta, eta etxe kaleratzea gauzatzea erabaki zuen.
Emakume bat eta bere semea izan ziren etxegabetuak, eta emakumearen senar ohiak jarri zuen martxan huste prozedura, Zabaleako etxebizitza saldu nahi duelako.
Hego Uribeko Kontseilu Sozialistako kideek salatu dute "azken urteetan garatzen ari den burgesiaren ofentsibaren adierazpen garbia" izan zela atzokoa: "Proletalgoa bizi-bitartekoetatik kanporatua izaten ari da. Kaleratzeak, masa zabalen pobretzea, bizitzaren garestitzea... orokortzen ari direla nabaria da".
"Egoera horri aurre egiteko ezinbestekoa zaigu proletalgoaren bizi-baldintzen defentsarako babes mekanismoak garatzea, beti ere, antolakuntza komunista hedatzeko helburuarekin", aldarrikatu dute: "Izan ere, ekoizpen eredu kapitalistaren gaindipena helburu duen antolakuntzaren bidez bakarrik lor ditzakegu kalitatezkoak, doakoak eta unibertsalak diren etxebizitzak".