Gasteizko (Araba) Olabide Ikastolako langile-batzordeak jakinarazi duenez, administrazio-lanak egiten zituzten bi langile kaleratu dituzte, lan horiek azpikontratatzeko. Gainera, lanean jasandako "jazarpen morala" ere salatu dute kanporatutako beharginek. Azken egunetan, langile-batzordeak deituta, protestak izan dira Ikastolan bertan, kaleratzeak salatzeko.
"Arrazoi ekonomikoengatik" bidali dituzte kalera bi beharginak, eta langile batzordeak seinalatu du azpikontratazioak langileen prekaritatea dakarrela. Hala, beldur da Ikastolako Kontseilu Errektoreak ez ote dituen beste lanpostu batzuk ere azpikontratatuko. Mobilizazioekin jarraituko dute, kaleratutako langileak berriz har ditzaten.