Gaur, otsailak 28, hasiko da Elkartasunetik, klase batasunera egitaraua Gasteizen (Araba). Langileok Haustura Politikoa dinamikak jarri du martxan hamar eguneko ekimena, martxoaren 3ari eta martxoaren 8ari lotuta. Otsailaren 11n aurkeztu zuten jendaurrean.
17:30ean emango diote hasiera egitarauari, Gasteizko Gaztetxean, aurkezpen jaialdiarekin. 18:00etan Langileriaren independentzia politikoa hitzaldia eskainiko du Kolitzak, eta 20:00etatik aurrera kontzertuak izango dira. Igitaia, Miku, Krudo eta Droga Purpura arituko dira oholtza gainean.
Auzolanak eta aldarriak
Martxoaren lehenengoan jarraituko dute jarduerek, Etxebizitza Sindikatuaren espazioetan auzolana eginez. Goiz osoan jardungo dute lanean, eta 14:00etan bazkaria egingo dute Auzolana pilotalekuan. 15:30ean, Iruñerriko Langileen Autodefentsa Sarearen eta Etxebizitza Sindikatuaren arteko solasaldia hasiko da.
Martxoaren 2an, aldiz, 1976. urtean Arabako hiriburuan erail zituzten beharginak omenduko dituzte. Baratza aretoan izango da ekitaldia, 19:00etan. Martxoaren 3a aldarrikapen eta borroka eguna izango da aurten ere, eta manifestazioaren barruan, bloke propioa deitu du Langileok Haustura Politikoak. 18:00etan irtengo da Rafa plazatik.
Emakume langileak eta antolakuntza
Horren ostean hasiko dira martxoaren 8ari begira prestatutako ekimenak. Martxoaren 5ean, Emakume langilearen ahalduntze politikoaz tailer ez-mistoa egingo dute, 17:00etan Amaia zentroan. Martxoaren 7an, 11:00etan, Antolakuntzan datza iraultza hitzaldia izango da Itaiaren eskutik, Aldabe Gizarte Etxean.
Bestalde, martxoaren 8an mobilizazioetara batzeko deia egin du Langileok Haustura Politikoak.