Atzo bezala, ehunka pertsona batu dira gaur Errotxapeako (Iruñerria, Nafarroa) Plaza Gorrian, atzo atxilotutako hamar gazteei elkartasuna adierazteko eta haien askatasuna exijitzeko. Poliziaren esku jarraitzen dute atxilotuek, eta Iruñeko Udaltzaingoaren kalabozoetan eman beharko dute gaurko gaua ere. Bihar lekualdatuko dituzte Nafarroako Probintzia Auzitegira, epailearen aurretik igaro daitezen. Hark erabakiko du aske utziko dituzten edo ez.
Sekretupean dago oraindik polizia-operazioak oinarri duen ikerketa, baina gaur jakinarazi dutenez, beste bi pertsona deitu dituzte deklaratzera auzibide berdinaren harira. Atzokoan hainbat iturrik baieztatu zutenez, "talde kriminal" bati lotutako hainbat delitu egozten dizkiete atxilotutako gazteei, eta miaketetan askotariko materiala konfiskatu zieten polizia-agenteek.
Baldintzak kalabozoetan
Gaur arte ez diete utzi atxilotuei haien konfiantzazko abokatuekin aurrez aurre egoten. Hala, gaurkoan jakinarazi ahal izan dute zein baldintzatan dituzten gatibu ziegetan. Besteak beste, salatu dute ez dietela behar duten guztietan utzi komunera joaten edo ura edaten, eta gaua pasatzeko manta bat besterik ez dietela eman.
Gutxieneko osasun-neurriak ere ez dizkietela bermatu esan dute; izan ere, COVID-19a dela-eta, bakartuta behar luke egon atxilotuetako batek, baina kalabozoetan guztiak ondoan dituztela azaldu dute gazteek. Bestalde, ez diete musukoak aldatzeko aukerarik eman atxikita dituztenetik. Gainera, haien gertukoei ez diete utzi oinarrizko zenbait material helarazten, esaterako, aldatzeko arropa eta higienerako materiala.
Argazkiak: GEDAR LANGILE KAZETA eta Errotxapeako Gaztetxea