Itsasoz migratu nahian ari ziren hiru pertsona hil dira asteazken honetan Greziako uretan, Quios irlatik hurbil. Baltsa puzgarri batean zihoazen 27 lagun, eta ontziak behea jo zuen badia harritsu batean. Hiru pertsonak (iturri batzuen arabera, haurrak ziren) bizia galdu zuten, eta gerora erreskatatu zituzten beste hamasei; tartean, adin txikiko zortzi. Gainerako guztiak desagerturik daude.
Baltsak hondoa jotzean, ihes egitea lortu zuten gutxienez hiru pertsonak, eta Quios uhartera heldu ziren. Haiek jakinarazi zuten badian harrapatuta zeudela hainbat lagun, eta orduan hasi ziren erreskate-lanak.
Itxura denez, jatorri afganiarrekoak dira ontzian zihoazen pertsonak, eta Turkiako kostaldetik irten ziren, Europar Batasuneko kostaldera iristen saiatzeko.