Azken egunetan, beste hainbat eraso matxista atera dira argitara Euskal Herrian. Aurreko asteazkenean, gizonezko bat atxilotu zuten Tuteran (Nafarroa), zenbait emakumeri eraso egiteagatik. Kirol-instalazio baten barruan, hainbat emakumeri musu ematen saiatu zen 58 urteko erasotzailea.
Aurreko ostegun arratsaldean, bestalde, Zaldibarren (Bizkaia) jasan zuen sexu-eraso bat emakume batek. Salaketa bat jarri zuen, eta, itxura denez, gertakariak ikertzen ari dira.
Santurtzin (Bizkaia) ere eman dute eraso baten berri. Larunbatean, herriko festetan, emakume bati eraso zion bere bikotekideak: kalean zirela jo zuen, eta atxilo eraman zuten gizona. Ez da Santurtziko jaietan salatu duten eraso bakarra izan: aurreko asteburuan, sexu-eraso bat egin zioten beste emakume bati.