Maiatzean 7.549 pertsona gutxiago daude langabezian Hego Euskal Herrian, Espainiako Estatuko Enplegu Zerbitzu Publikoak argitaratutako langabeziari buruzko azken datuek adierazten dutenez. Hori bai, ia kontratazio denak aldi baterakoak izan dira; %92,45, hain zuzen ere.
Datuen arabera, emakumeen laneratzea bereziki motela da, izan ere, langabeen %56,6 emakumeak dira; aurreko hilabeteetakoa baino ehuneko altuagoa da hori.
Europaren gainetik
Europako joerei so, Hego Euskal Herriko langabezia-tasak batez besteko orokorraren gainetik jarraitzen du. %12,2koa da langabezia-tasa Hego Euskal Herrian, eta Europar Batasuneko batez bestekoa, aldiz, % 7,3koa da.
Diru-laguntzarik gabe
Inolako diru-laguntzarik jasotzen ez duten beharginen ehunekoa %55,4ra igo zen apirilean. Halaber, gutxienez 93.484 pertsona daude inolako diru-sarrera egonkorrik gabe. Hori gutxi balitz, langabeen %25,3k baino ez du jaso kontribuzio-mailako langabezia-prestazioa.