Hezkuntza arloko azpikontratek ere grebara joko dute Araban, Bizkaian eta Gipuzkoan. Hala, irailaren 15erako EAEko hezkuntza komunitatean deitutako grebara batuko dira garbiketa-zerbitzuetan, jantokietan eta eskola garraioan soldatapean ari diren beharginak. Greba deitzeko arrazoia honakoa dela adierazi dute sindikatuek: "Ez dagoela negoziaziorik eta prebentzio eta segurtasun neurrien planifikaziorik, osasun-alarma egoeran".
Besteak beste, salatu dute, garbiketa-zerbitzuetako langileen artean, gaixo daudenen eritasun bajak bete gabe daudela oraindik. Era berean, "informazioa eta baliabideak" eskatzen dituzte COVID-19aren hedapenak baldintzatu duen testuinguruan.
Bereziki kolpatuak
Hezkuntza arloan azpikontratatutako hainbat sektoretako langileek, pandemiaren aurretik ere, hainbat borroka abiatu zituzten haien lan-baldintzak hobetzeko. Adibidez, EHUko garbitzaileek grebari ekin zioten martxoan, ezarritako hitzarmena betetzearen alde. COVID-19 birusaren zabalpenarekin batera inposaturiko neurrirekin ere, lan-baldintzen okertzean sakondu zutela salatu zuten; adibidez, garbitzaileek adierazi zuten greba etetera behartu zituztela eta %100eko gutxieneko zerbitzuak inposatu zizkietela.
Jantokietako langileak ere pandemiaren testuinguruan bereziki kolpatuak izaten ari dira. Esate baterako, martxoaren 12an, Gasteizko (Araba) eskoletako jantokietako beharginek adierazpen bat argitaratu zuten; bertan, "sektore kolpatuenak" baztertu izana gaitzetsi zuten, hezkuntzako langileen artean zeuden "arrakalak" salatuz.