Ekainaren 15ean, Legution (Araba) egingo du jardunaldi nazional bat Itaia Emakumeon Antolakunde Sozialistak. Urtero jartzen du halako hitzordu bat, egun osoko egitarau batekin, emakume langileon borrokaren inguruko eztabaida eta hausnarketa politikoa erdigunean jarrita.
Aurreratu duenez, aurten ere helburu horrekin antolatu du jardunaldia, eta hamaika auzi politikori helduko diete hainbat hitzaldiren eta mahai-ingururen bidez. Horretaz gain, elkarrekin egon ahal izateko ere baliatuko dute hitzordua. Laster jakinaraziko dute egitarau zehatza.
Iaz, 2023an, Gernikan (Bizkaia) izan zen Itaiaren urteko jardunaldia, eta ehunka lagun elkartu ziren bertan. Hainbat gobernuren politika feministez, emakume langileen proletarizazioaz, emakume langileen eginkizun politikoaz eta matxismoaren forma berriez aritu ziren, besteak beste.