Plásticos Brello enpresak bi lantoki ditu Nafarroan, Uharten eta Azkoienen. Uharteko plantilla hemezortzi langilek osatzen dute, eta kaleratuak izateko arriskuan daude. Enpresak "ekoizpena berrantolatzeko asmoa" duela adierazi du eta, argudio horrekin, enplegu-erregulazioko espediente bat ireki du. Izan ere, ekoizpena Azkoiengo Industrias Bardi lantokira lekualdatu nahi du Plásticos Brelloko zuzendaritzak, etorkizunean "bideragarritasuna ziurtatzeko".
Langileek azaldu dutenez, uztailaren 1ean izan zuten enplegu-erregulazioko espedientearen berri, eta ordura arte "ekoizpen-jarduera normala" izan zen. Egun batetik bestera, ordea, ekoizpena gelditu egin zuen zuzendaritzak, eta "baimen ordaindu bat" ezarri zien langileei.
Egoera salatzeko, elkarretaratze bat egin zuten langileek joan den asteartean. Jakinarazi dute Uharteko fabrikak Nafarroako Volkswagen lantegia hornitzen duela, kotxeentzako plastikozko piezak egiten ditu-eta. Gaineratu dutenez, Plásticos Brellon "%100eko ekoizpena" egon da martxan, eta ez dute lantegia ixteko erabakia ulertzen. Alternatiba bat exijitu dute beharginek, bai eta langileen kaleratzea bertan behera uztea ere.