Pasa den asteko elkarretaratzeen ondoren, bi orduko lanuzteak egin dituzte txanda bakoitzean Orozkoko (Bizkaia) Artiacheko langileek, bi egunez, kide baten kaleratzea salatzeko. Enpresak abuztuaren 20an kaleratu zuen behargin bat, diziplina bidea baliatuta. Bi orduko lanuzteak egin zituzten astelehenean eta asteartean, eta atzo ekoizpena gelditzea lortu zutela nabarmendu dute beharginek.
Enpresa, ordea, grebarako eskubidea urratzen ari dela ohartarazi dute, "barruko eskirolak erabilita". Produkzioa geratzea lortu ondoren, enpresak protestak eraginik gabe uzteko eskirolak baliatu dituela salatu dute enpresa-batzordeko kideek, eta haietako batek salaketa jarri du Bilboko (Bizkaia) Lan Ikuskaritzan.
Duela bi urtetik ari dira Artiacheko langileak kaleratzeen aurkako borrokan; aurrez, besteak beste, sei langilek auzitara jo zuten "kaleratze desegokiengatik". Langileek ohartarazi dute ez dutela kasu bakar bat ere "erantzunik gabe" utziko.