Gaua Deustuko (Bilbo, Bizkaia) polizia-etxean eman behar izan dute atzo, ekainaren 23an, Lekeition (Bizkaia) atxilotutako bi gazteek. Espainiako Auzitegi Nazionalaren aginduz, Ertzaintzak 07:00ak aldera hasi zituen miaketak haien etxebizitzetan, eta Deustura atxilo eraman zituen gero.
Biek deklaratu dute jada Espainiako Auzitegi Nazionalean, bideo-konferentzia bidez, polizia-etxetik bertatik. Karguekin, baina momentuz biak aske uztea erabaki du epaileak; dena den, epaiketaren zain geratuko dira, eta epaitegi batean sinatu beharko dute hamabost egunean behin.
Antza, iazko maiatzean ekintza batean parte hartu izana egotzi diete gazteei; Patxi Ruiz preso politikoa gose greban zegoenean egindako ekintza bati buruz ari da auzitegia, zenbait hedabideren arabera.
Atzo arratsaldean manifestazio jendetsua izan zen Lekeition, eta jende andanak adierazi zien klase elkartasuna bi gazteei.