Bi pertsona atxilotu zituzten Zerainen (Gipuzkoa) ekainaren 5ean, hainbat pertsona migratu legez kontra esplotatzea leporatuta. Senar-emazteak dira atxilotuak, baserri baten jabe dira, eta Idiazabal gazta ekoizten dute. Epailearen aurrean deklaratu ostean, aske utzi zituzten.
Maiatzaren 29an hasi zen Zeraingo baserri horretako baldintzei buruzko ikerketa, antza, Lan Ikuskaritzak eta Gipuzkoako Gizarte Segurantzak eskatuta. Artalde bat zaintzen eta garbitzen jarduten zuten gutxienez lau langile migratuk, eta, Lan Ikuskaritzak eurengana jo zuenean, ikusi zuen lan-kontraturik gabe aritzen zirela eta ez zeudela Gizarte Segurantzan izena emanda, besteak beste.
Langileek gerora jakinarazi dutenez, aipatutako baserriko jabeek miseriazko lan-baldintzak ezarri dizkiete. Astean zazpi egunez lan egitera behartu dituzte, atseden hartzeko aukerarik gabe, baita gaixorik egonda ere. Soldatak, gainera, hilean 300 eta 400 euro artekoak izan dira, "jabeen borondatearen araberakoak".