Ikasleek egindako presioaren ondorioz, Euskal Herriko Unibertsitateak (EHU/UPV) urrian jakinarazi zuen prozedura bat ireki zuela mezu faxistak zabaltzen ari zen Zuzenbideko irakaslearen aurka, eta, behin-behinean behintzat, ezingo zuela klaserik eman. Leioako (Bizkaia) campusean ari zen eskolak ematen, EHUk kontratatuta. Genero-indarkeriaren aurkako protokoloa aplikatuta jarri zuten martxan faxistaren kontrako prozedura, baina ez da horren inguruko berririk izan ordutik.
Baina duela zenbait egun atera zen argitara EHUk kanporatu egin duela irakaslea, eta honakoa omen da arrazoia: ez duela "probaldia gainditu". "Irakasle lanpostutik kendu da Alvaro Sanchez Fernandez eta unibertsitateak bertan behera utzi du sinatutako lan-kontratua, langileak probaldia gainditu ez duelakoan", adierazi du EHUk ohar batean. Horrekin batera, lan-poltsatik kendu du.
Ehunka ikaslek irailaren amaieran ekin zioten Leioako Zuzenbide Fakultatean mobilizatzeari, Sanchezek zabaldutako mezu faxista, arrazista, klasista eta matxistak zirela-eta. Irakaslea bota zezala exijitu zioten EHUri, baina ikasleen protestak kriminalizatzea izan zen unibertsitate publikoaren lehen erantzuna. Horren ondoren, baina, jarrera aldatu eta berak kontratatutako faxistaren kontrako neurriak hartu behar izan zituen EHUk, gazteek egindako presioari esker. Azkenean, irakaslea kanporatzea erabaki behar izan du.