Atzo goizean hustu zuten Agustindarren eskola Martutenen (Gipuzkoa), bertan bizi ziren 100 lagun baino gehiago, gehienak gazte etorkinak, kale gorrian utziz. Etxegabetze masiboa salatzeko eta pertsona migratzaileek jasaten duten kriminalizazioa salatzeko, manifestazio bat egin zuten iluntzean egunka lagunek, Egiako epaitegitik hiriaren erdiguneraino.
Ehunka pertsona arrazakeriaren aurkako mobilizazio horretan egongo zirela probestuta, ordu bererako, deialdi paralelo bat egin zuen Lo que no te cuentan de Donostia (LQNTCDD) kanal erreakzionarioak, aurreikus zitekeen modura, euren gorroto-mezuak oposiziorik gabe kaleratu ahal izateko. Hala, jende ugari Inor ez kale egoeran. Arrazakeriaren aurrean antolatu lelopean izaten ari zen mobilizazioan zegoen bitartean, udaletxe aurrean elkarretaratu ziren hainbat pertsona, LQNTCDDren deiarekin bat eginez. Inpunitaterik ez. Delitua ez da negoziatzen, zigortu egiten da hartu zuten aldarritzat.
Ohi bezala, "segurtasun" faltaren eta "delinkuentziaren" aurkako erreibindikazioez baliatu zen kanal erreakzionarioa, pertsona etorkinak jopuntuan jartzeko eta haien aurkako mezuak zabaltzeko. Aldarri horien bueltan biltzen eta mugitzen ari direnen partetik, gainera, diskurtsoaren gogortze bat suma daiteke azkenaldian sareetan: gero eta ohikoagoa bihurtzen ari da, segurtasuna eskatzearekin batera, migratzaileen kanporatzea eskatzea.