Bi hilabete igaro dira Euskal Herriko Kontseilu Sozialista (EHKS) aurkeztu zutenetik, Eibarko (Gipuzkoa) Astelena frontoian egindako ekitaldi jendetsu batean. Datorren hilerako, bere aurreneko jardunaldi nazionala antolatu du EHKSk: martxoaren 16an izango da, Donostian (Gipuzkoa), eta, nagusiki, estatuen erreforma autoritarioa aztertuko da bertan.
Atzo eman zuen egitarauaren berri antolakunde berriak. Lau saio izango dira egun osoan; hiru hitzaldi goizean, eta mahai-inguru bat arratsaldean. 10:00etan izango da lehenengo hitzaldia: Estatuen erreforma autoritarioa eta langileon eskubide politikoen aldeko borroka. 12:30ean, berriz, bi hitzaldi egingo dituzte aldi berean: Inperialismoa, gerra eta genozidioa: joko-zelai kapitalistaren konfigurazio berria batetik, eta Krisi kapitalista eta faxismoa klase ertain nazionalen gainbehera perspektiban, bestetik.
Horren ostean bazkaltzeko aukera izango da, eta 17:30ean hasiko da eguna biribiltzeko azken saioa. Mahai-inguru bat izango da, Parlamentarismoa, hauteskunde-zikloa eta estatuen erreforma lantzeko.
EHKSk jakinarazi duenez, euskaraz izango dira saioak, baina itzulpen-zerbitzua izango da gaztelerara zein frantsesera.