Alarm Phone gobernuz kanpoko erakundeak larunbat goizaldean jaso zuen abisua: Libiako kostaldean, Bengasi hiritik 177 kilometrora, noraezean zegoen txalupa bat. Itsaso bidez migratu nahian ari ziren 47 pertsona zihoazen ontzian, baina itsaso zakarra zela-eta, arrisku bizian zeuden. Libiako, Italiako nahiz Maltako kostazainei eman zien abisua Alarme Phonek, baina ez zuten esku hartu: merkataritza-ontzi batek lortu zuen azkenean migratzaileetako hamazazpi erreskatatzea. Gainontzeko 30 lagunak itsasoan galdu eta desagertu dira.
Teorian, Libiari dagokion erreskate-eremuan zegoen txalupa, baina herrialde horretako autoritateek ez zuten esku hartu arriskuan zeuden migratzaileei laguntzeko. Alarme Phonek seinalatu du, dena den, Italiako autoritateek ere ez zutela ezer egin jakinaren gainean egon arren. Hortaz, ez zen inolako erreskaterik egon ez batzuen ez besteen partetik.
Joan den otsailaren amaieran, beste sarraski bat izan zen Mediterraneoan; Italiako Calabria eskualdean, hain justu. 200 pertsona inguru zeramatzan ontzi bat bitan zatitu zen, eta, azken kalkuluen arabera, gutxienez 79 lagunek galdu zuten bizia.