Gutxienez 48 pertsona migrantek jarraitzen dute desagertuta El Hierro uharte inguruan, Kanarietan. Itsasontzi berean zihoazen guztiak: hondoratzen hasi eta galdu egin zen duela lau egun.
Itxura denez, 80 eta 90 lagun artean zihoazen ontzian. Itsas-salbamenduak atzeman zituenean, erreskate-lanei ekin zienean eta barruan zihoazen pertsonak altxatu zirenean, irauli egin zen itsasontzia. Urperatzen hasi zen, eta uretara jausi ziren guztiak.
27 pertsona besterik ez zituzten erreskatatu itsas-salbamendukoek, eta, aurrerago, bederatzi pertsona aurkitu zituzten hilik. Aurrera doaz bilaketa-lanak El Hierro inguruan, baina, momentuz, ez dituzte desagertutakoak topatu.
Hilketarik handiena 2009tik
Azken ia 30 urteetan Kanariar uharteetan erregistratu den sarraskirik handiena izango litzateke honakoa. Horren aurretik, 2009koa da erregistroetan jasotako heriotzarik masiboena. Urte horretako otsailean, Kokoteroen kostatik (Guatiza, Lanzarote) hurbil hondoratu zen ontzi bat: 31 lagun zihoazen bertan, eta horietatik 25ek galdu zuten bizia.
Urteko lehenengo zazpi hilabeteetan, gutxienez 1.542 pertsona hil edo desagertu dira Europara itsasoz heldu nahian. Bai kopuru absolutuetan bai portzentajeei erreparatuta, Kanarietara doan migrazio-bidea ari da izaten hilgarriena: ACNURek emandako datuen arabera, 31 lagunetik bat hil dira ibilbide horretan.