Ontzi pneumatiko baten bidez Kanarietara iritsi nahian ari ziren 51 lagun hil dira itsasoan iragan asteburuan. Gutxienez 55 pertsona zeramatzan ontziak, eta Marokoko hego-ekialdetik irten zen. Migratzen ari ziren pertsonek zortzi egun izugarri egin zituzten itsasoan galduta, noraezean. Hil egin dira gehienak; lau lagunek baino ez dute biziraun.
Kanarietara heltzeko migrazio-bidean beste naufragio hilgarri bat izan eta hamar egun eskasera atera da argitara azken sarraski hori. Ekainaren 20an, beste ontzi pneumatiko batean zihoazen 60 pertsona hondoratu ziren itsasoan; bi pertsona hilik topatu zituzten, eta gutxienez 35 desagertu ziren. Hamabost eguneko epean, beraz, ia ehun pertsonak galdu dute bizia, ontzi bidez, Kanarietako itsasertzera iritsi nahian.