Abadiñoko (Bizkaia) Xirimiri tabernako beharginek urriaren bukaeran egin zuten agerraldi bat, Durangaldeko Laneko Autodefentsa Sarearen eskutik, euren egoera azaltzeko eta ostalaritzako "miseriazko baldintzak eta gehiegikeriak" salatzeko.
Xirimirin lanean hasi zirenetik jasan dituzten baldintza negargarriak azaldu zituzten, eta jakinarazi zuten, gainera, nagusiek egun batetik bestera itxi dutela lokala. Langileei dirutza zor diote oraindik, ordea: 20.000 euro inguru, guztira.
Hala, borrokan ari dira tabernako behargin ohiak eta LAS, nagusiek ez baitute zor dutena ordaindu nahi. Ostegun honetan, azaroaren 21ean, elkarretaratze bat egingo dute Durangon (Bizkaia): ostalaritzako abusuak salatuko dituzte, eta Xirimiriren jabeei exijituko diete zor duten dirua ordaintzeko. Andra Marin izango da protesta, iluntzeko 19:30ean.