Gaur, uztailaren 18an, Bilboko (Bizkaia) Aresti Zentro Sozialista husteari ekin diote Ertzaintzak eta udaltzainek. Aldez aurreko jakinarazpenik egin gabe ari dira desalojoa gauzatzen polizia-indarrak, Bilboko Kontseilu Sozialistak jakinarazi duenez. 08:30ean bertaratu da Arestira Polizia, eta ez du inolako agindu judizialik erakutsi. Desalojoa dela-eta hurbildu diren pertsonak identifikatzen ari da, gainera.
Urte honen hasieran eman zuen berria Kontseilu Sozialistak: eraikin bat birjabetu eta Zentro Sozialista berri bat ireki zuen Deustu auzoan. Jabetza ugari dituen enpresa handi bat da eraikinaren legezko jabea, eta hainbat urtez eduki du hutsik eta erabilerarik eman gabe.
Urtarriletik hona, askotariko jardun politikoa eta kulturala izan da Arestin: oinarrizko produktuen biltegi bat daukate martxan, etxebizitzari lotutako arazoen aurrean babesa emateko bulego bat dauka Bilboko Etxebizitza Sindikatu Sozialistak, ikasketa-gela bat eskaini diete inguruko ikasleei, boxeo- eta dantza-eskolak izan dira, askotariko jarduera kulturalak eta aisialdikoak antolatu dituzte, eta abar.
Urkila Zentro Sozialistaren desalojoa, 2022an
Aurretik ere izan du beste Zentro Sozialista bat Bilbok, Urkila izenekoa, Errekalde auzoan. 2022ko apirilean jarri zuten martxan, baina urte horretako uztailean hustu zuen Poliziak. Orduan ere, aldez aurreko jakinarazpenik egin gabe izan zen desalojoa.