Etxe-kaleratzeak eta, orokorrean, desalojoak erraztu nahi dituzte: kaleratzeak azkarrago eta epaiketarik gabe gauzatu ahal izateko neurri gehiago atera dituzte mahaira PPk eta EAJk. Espainiako Senatuan "okupazioari aurre egiteko" neurri bat atera dute aurrera aurten, PPren eta Voxen babesarekin. EAJk, bestalde, Espainiako Gobernuaren lege-proiektu bati lotutako emendakin bat aurkeztu du berriki, posible izan dadin okupatutako nahiz ordaindu gabeko etxeak azkar hustea; 48 orduan, hain justu.
Neurri horien kontra, PPren eta EAJren hainbat egoitza markatu dituzte azken orduetan; hala nola, Bilbon (Bizkaia), Donostian (Gipuzkoa) eta Gasteizen (Araba). Egoitzetako ateetan irakur daitezke ondoko mezuak: "48 orduko desalojoaren aurka borrokatu", "Okupazioaren kriminalizazioari ez", "Okupazioaren aurkako lege proposamenak gelditu" edota "24 orduko desalojo azkarrei ez".