Laziok eta Realak gaur neurtuko dituzte indarrak Erroman (Italia), Europa Ligaren barruan. Realeko zale ugari bertan dira jadanik, eta bart egin diete eraso Lazioko faxistek, modu antolatuan. Erasorako material eta arma ugari hartuta, realzaleen kontra oldartu dira 80 bat nazi: Realeko gutxienez hiru jarraitzaile labanaz sastakatu dituzte faxistek (dirudienez behin baino gehiagotan), eta kolpatu egin dituzte beste batzuk. Gerora atera dira argitara Lazioko zaleek zeramatzaten armen irudiak: labanak, mailuak, burdinazko barrak, makil handiak eta abar ikusten dira.
Erromako Laziok dauka, Europa mailan, jarraitzaile talderik faxistenetakoa. Joan den maiatzean bertan, Munichen (Alemania), nazismoarekin lotura zuzena duen garagardotegira joan ziren Lazioko zaleak: Adolf Hitlerrek, bere garaian, bertan aurkeztu zuen proprama politiko nazia. Zabalpen handia izan zuten Lazioko jarraitzaile italiarrei bertan hartutako irudiek, agur eta kantu naziak egiten ageri baitira.