Ikasturte honetan ere selektibitatearen kontra protesta egitera deitu du Ikasle Abertzaleakek, maiatzean jakinarazi zuenez. Unibertsitatera sartu ahal izateko azterketa-froga hori "filtro sozialerako, curriculuma inposatzeko, indibidualismoa areagotzeko eta, funtsean, hezkuntzaren elitizazioan sakontzeko tresna" bat dela salatu zuen, eta mobilizatzera deitu zuen Hego Euskal Herrian.
Selektibitateari ez! lelopean, aurreko asteartean Nafarroako Unibertsitate Publikoko (NUP) Liburutegi Plazan izan zen elkarretaratze bat. Gaur goizean, beste lau campusetan egin dute protesta ikasleek: Ibaetako (Donostia, Gipuzkoa) Aulariopean, Gasteizko (Araba) Farmazia Fakultatearen atzeko aldean, Leioako (Bizkaia) Mikel Laboa plazan eta Eibarko (Gipuzkoa) Ingeniaritza Eskolan. Ezetz esan diote, hala, "ikasleon osasun mentala kaltetzen duen, lehiakortasunean hezten gaituen eta filtro sozial gisa funtzionatzen duen ebaluazio sistemari".