Superberriak enpresak atzo, irailaren 20an, jakinarazi zuen atzera botako duela bere eskumeneko lau BM saltokitan ezarri nahi zuen lan-erregulazioko espedientea. Hain zuzen, Bilboko (Bizkaia) Alde Zaharreko, Amurrioko (Araba), Laudioko (Araba) eta Ugaoko (Bizkaia) BM dendak zarratu eta horietan aritzen diren 70 beharginak kalera bidali nahi zituen Superberriakek, baina erabaki horren aurrean, protestei ekin zieten beharginek.
Aurreko ostiralean, irailaren 16an, greba mugagabeari ekin zioten. Ia %100eko erantzuna izan du greba deialdiak, eta azken egunetan itxita egon dira espedientea indarrean sartzeko arriskuan zeuden lau dendak. Elkarretaratzeak egin dituzte saltoki guztien aurrean, eta manifestazio jendetsu bat Laudion.
Ikusteke dago orain, espedientea bertan behera utzi duela, zein jarrera hartzen duen enpresak lau saltoki horiei dagokienez. Dirudienez, negoziazio epe bat irekiko dute zuzendaritzak eta langileen ordezkariek.
Barakaldoko (Bizkaia) BM saltokian ere enplegu-erregulazioko espediente bat aplikatzeko asmoa azaldu du berriki Superberriakek. Hamabi langilek jarduten dute han, eta lanuzteak egin dituzte hilabete honetan.