Zarauzko (Gipuzkoa) Udalak berriz zentsuratu du Jon Paredes Txiki-ren eta Anjel Otaegiren omenezko ekimen bat. Oraingoan, erakusketa bati jarri dio debekua EAJ eta PSE-EE buru dituen udal-gobernuak: duela 50 urte erregimen frankistak fusilatutako bi militante politikoak oroitzen ditu Iratzarrek eta Olaso Dorreak sorturiko bilduma ibiltariak, baina hura Zarauzko udal-areto batean jartzea debekatu du udalak. Naiz-en arabera, gainera, baimena ukatzeko arrazoi zehatzak idatziz azaltzea ekidin du gobernuak.
Honakoa ez da Zarauzko Udalak Txikiren eta Otaegiren oroimenezko ekimen bat itotzen duen lehen aldia. Joan den abuztuan, Santa Barbaran eskegi zuten bi militanteen aurpegiak zeramatzan olana erraldoi bat, baina "ingurumenari" loturiko arrazoiak aitzakiatzat hartuta, hura 24 orduan baino gutxiagoan kendu zuten udal-langileek, udal-gobernuaren aginduz.