Terrorismoaren kontrako Frantziako Estatuko fiskaltzak bost urteko zigorra eskatu zuen atzo Josu Urrutikoetxearentzat, 2017an eman zioten zazpi urteko zigorra "gehiegizkoa" dela ebatzita. Hala ere, Urrutikoetxea FIJAIT fitxategi automatizatuan mantentzeko eskakizuna berretsi du prokuradoreak. "Arau-hauste terroristen egileak" jasotzen ditu fitxategi horrek, eta Urrutikoetxeari 2020ko urrian jakinarazi zioten han sartu zutela.
2011 eta 2013 artean ETAko kide izatea leporatzen dio fiskaltzak, bai eta klandestinitatean bizi eta ETAko kideekin harremana izatea ere. 2017an izan zen haren aurkako epaiketa, baina auzi-saioan parte hartu ez zuela argudiatuta, hura errepikatzeko eskaera egin zuen Urrutikoetxeak. Prozedurari lotutako gorabeherak direla eta, ordutik hiru aldiz atzeratu dute epaiketa, eta orain ekin diote berriz auzia lantzeari.
Defentsak azpimarratu du akusazioak ez duela "txostenik osatu", eta salatu du Urrutikoetxearen aurkako frogak ez direla argigarriak. Irailaren 1ean jasoko dute epailearen erabakia.